Vírímóni

Ísu kwíyómpaꞋa irówana Póro moórá-kwaai aíyayaan-umai sísamaivakemba kaer-íyáꞋiyo. miráumai-ima maisuwéna Vírímónina imáyáa éna maanáímbá agaimái tuwówana kwenópaꞋa kuráiye. ááéma Vírímóni kesí mayáí mayáínkwáe séna Ónísímasimba meéyámbaꞋmai máánkarowana mayááena mimbáyáígón-áároi inkaiséna óꞋ-mapaꞋa koména Ísun-aai ísáapaꞋa téna Póro ándávaꞋo máyopaꞋa kwéawaꞋnaa-uwana Póro Vírímóni Ónésímasimba tayauwéꞋmai airáínkwáe séꞋa maanáúváímá agaimái amúne séna agaimái tuwówana VírímóninopaꞋa kuráiye.

Philemon

1Vírímóniyo kemá Póro maanáúváímá kwéagayaumne. kesí kwaási po kesé tágárotare mayáí kwémayaandawai isaaó. Ísóigona kwaási ená naaúmpaꞋa torupamái kwémaewai ísáaro. Ápíyaao kentáá símánaakogwaraꞋa isaaó. Ákípaasiyo keséya tágárotare asiramái mayáí kwémayaandawai egwáráꞋá isaaó. Ísu Káráísitin-aai simátimewandarakemba ándávaꞋa sínkaraawaꞋa méꞋa maanáúváí agaimái amúne. kenkáí síváko Tímóti kesé máyáiye. 3kentáásivo Áánútuwe kentáásí Ísóigo Ísu Káráísitiye úwoi kwétuwaꞋnaa-esarai paru kwéumatinkaayantaveꞋa námúnaa kwésune.

4Vírímóniyo kentáásí Ísóigo Ísuwe aráápamai mé Áánútuna kwaásivimba arumbá kwétime máyaanda-aimba iséꞋa póꞋa ÁánútumpaꞋa námúnaa kwésunda entávéꞋa imáyáa kwéeꞋa súwi kwésune. 6enté kentési mayáígó moóráiꞋa kwéisata méta Ísóigowe tarúmaiya máyaundayavenaya kwemá kawetá kwéumasinkaisa awánaniyondayaveꞋa námúnaavinkemba Áánútumba kwéaisaa-une. 7Vírímóniyo kesíváko po Ísóigona kwaásivimba arumbá kwétime túwaꞋnaa ónasa aúnáiꞋa umái máyáan-aimba iséꞋa aamoí kwéumankaunana sirunkó kaweꞋá kwéisaꞋa áwaꞋnaa umai námúnaa kwésune.

8Ísu Káráísiti asirayámbá símakaimba póꞋa íma inkaiséꞋa emá moóráiꞋa uwo séꞋa kwésundanivo mirán-áímbá íma sénaumpo 9aánoumai kwempakémbá áísaa eꞋa séꞋa sendantembá mirá íníyone sénaumne. emá arumbá kwésimenaꞋa kemá sirumbá kwéamunda póꞋa aánoumai kwempakémbá simáméndaiꞋa mirá íníyone kwésune. kemá Póro Ísu Káráísiti kwená mayáí símakaimba kwémaeꞋa anónuꞋmai káúnasa ándávaꞋa sínkaraawaꞋa méꞋa 10moóráwai áwíꞋa ÓnísímasintaveꞋa kwésune. ándávaꞋa méꞋa Ísóigon-aai simámunana iséna ÍsóigompaꞋa tisaꞋá séꞋa kesí iyámpóíraamba óne séꞋa póꞋa kwentávéꞋa kwésune. 11ááéma ená mayáí íma kaweꞋá umái mayómba mayáígón-áároi inkaiséna kóuraimbanivo ívéꞋa kesí mayáí kaweꞋá umái kwémaena ená mayáí kaweꞋá umái mayáníye. 12ívéꞋa aiꞋmáráanana enópaꞋa kwínama kesááninkaaniꞋa umái airáníyono. 13Ónísímasimba tátokaanana súwaꞋnaa ínkwáe séꞋa únda isaꞋá úwoi mirán-ímáyáá úne. Ísu Káráísitin-aai simátimewandarakemba ándávaꞋa mósínkaawaꞋa máyaunda enanondá Ónísímasi súwaꞋnaa íníye óndanivo 14némpaꞋa mémpo íma owé síníyondayaveꞋa póꞋa íma úwoi tátoranaunda póna kesé ména súwaꞋnaa íníye. íma súwaꞋnaa ónáe sindá súwaꞋnaa ónavainivo ená imáyáavinkemba súwaꞋnaa íníyone.

15Ónísímasi mayáígón-áároi inkaiséna embá auwéna sáwíyankaꞋa óꞋom-bapaꞋa tamáyáimbanivo enópaꞋa kwéna aasiyaasí koméniye-imayaa kwéune. 16Ísóigona kwaásigomo óndantemba kwemá mirá kwéena enávákaamba póna íma ená mayáí kwémayaiwaiye suꞋmainivo enávákoraamba éna enópaꞋa kwíníye. kemá kwembá sirumbá kwéamundantemba egwáráꞋá arumbá kwembá améma kesíváꞋan-iye síníyone.

17Ísóigona mayáígó enté kentési mayáígó moóráiꞋa kwéimba po kentáváí kesí naaúmpaꞋa iyuwó kwésendantemba Ónísímasintavai mirá síníyone. 18embó sáwíꞋo umánkenamo moórá-yantaaꞋo mairénamo ímo ámakainamo e íma kwenópaꞋa te kesópaꞋa tinaꞋá kemá meéyán-ónaumne. 19kemá Póro kesiyáándei kwéagayeꞋa mimbéyámbá aménaumne kwésune. Ísu Káráísitin-aai simámewana áraire siráanda maíꞋmaiꞋa íníyonda-meyamba kempáꞋá kwáyáimba pó íma kanaán-umai meéyán-íníyonda-aimban-iye. 20kesívákoo Ísóigona kwaási ómpo áísaa úndantemba mirá inaꞋá Ísóigo aúrankaꞋa aúnáiꞋa umái máéno.

21maanáúváí agayáúnda imáyáa éꞋa séꞋa kesáái isé áísaa úndantemba mirá íníyone. emó íníyondawai kemó áísaa úndawaimba usáyaaitaniyone. 22enópaꞋa ke kónaundayavai kesí maruꞋá usúkasinkaao. ándávakemba ayúsinkaiyaꞋa ená naaúmpaꞋa kónaundayavai ÁánútumpaꞋa námúnaa simásinke moórá-maruꞋa usúkasinkaao.

23moóráwai áwíꞋa Épávarasi kwemá Ísu Káráísitin-aai simátimunkakemba ándávaꞋa ánkaraawana kesé ména keinárawatavena séna kaweꞋá umái máéro kwésiye. 24kesé mayáí kwémayaawai túwíꞋa moóráwai Mááka moóráwai Árísítakasi moóráwai Tímasi moóráwai Árúku miwí sésa kaweꞋá umái máéro kwésewe.

Ísóigo Ísu Káráísiti keinárawate ména úwoi kwétuwaꞋnaa-intaveꞋa námúnaa kwésune.

Póro mináímbá simái ánásaumne.

25